Бизнес эрхлэгчдийн “Оргил Луу” нийгэмлэгийн Швейцар улсад туршлага судлах ээлжит бизнес аялал 2022 оны 9-р сарын 8-14-ний хооронд амжилттай зохион байгуулагдсан.
BPN хөтөлбөрийн оролцогчид болох нэмүү өртөг шингээсэн бүтээгдэхүүн үйлдвэрлэгчид болон үйлчилгээ эрхэлж буй Архангай, Увс аймаг болон Улаанбаатар хотын нийт 9 бизнес эрхлэгчид энэ удаагийн аялалд хамрагдсан.
Эрүүл мэнд, аялал жуулчлал, худалдаа үйлчилгээ болон хүнс, барилгын материал, хувцас үйлдвэрлэлийн салбарт үйл ажиллагаагаа явуулж буй бизнес эрхлэгчид маань өөрсдийн үйл ажиллагаатай ижил төстэй Швейцарын үйлдвэрүүдтэй танилцан, компаниудын удирдлагуудтай уулзаж, тэдний амжилтад хүрсэн туршлагаас нь сонсож санал бодлоо хуваалцсан.
Биднийг хүлээн авч өөрсдийн туршлагаа хуваалцсан компани болгонд нэг ижил зүйл ажиглагдсан нь ажилчин, ажилтнууд руугаа чиглэсэн тэднийг хөгжүүлэх бодлого, эрүүл мэндийн дотоод системтэй байсан ба компанид ажиллах сонирхолтой залуусыг 4 жил цалинтайгаар сурган бэлтгэж байсан. Энэхүү бодлого нь компанийн ажилтнуудын тогтвор суурьшилтай, урт хугацаанд эрүүл саруул, урам зоригтой ажиллах үндэс нь болдог байна. Тогтвор суурьшилтай ажиллах хүний нөөцийн асуудал манай аяллын оролцогчдын хувьд хамгийн чухал мөн сонирхолтой сэдэв байж энэ талаар Швейцарын бизнес эрхлэгчидтэй санал бодлоо солилцсон.
Аяллын үеэр 90 жилийн түүхтэй чихрийн үйлдвэрлэгч F. Hunzinger + Co AG хувьцаат компанийн үйл ажиллагаатай танилцаж, дэлхийн чихрийн зах зээлийн чиг хандлагын талаарх мэдээллийг авлаа. Мөн Монголдоо чихрийн үйлдвэрлэлийн дэвшилтэд, шинэ техник технологи нэвтрүүлэх, хамтын ажиллагааны талаарх боломжийг судалсан.
Түүнчлэн модон хаалга, цонх, фасад үйлдвэрлэлээр салбартаа тэргүүлэгч 4B AG хувьцаат компани, Швейцарын аялал жуулчлалын 3 дахь том компани болох Globetrotter Business Travel/ Groups, Цюрих хотод төвтэй дээд зэрэглэлийн худалдааны төв GLOBUS Zürich, Dr. mrd. Stefan – ийн чих хамар хоолойн эмнэлгээр тус тус зочилж үйл ажиллагаатай нь танилцаж тэдний амжилтын нууцыг хуваалцсан юм.
Globetrotter Business Travel/ Groups компанийн үүсгэн байгуулагч, захирал уулзалтын үеэр хэлсэн “Ажилтнуудаа амжилтад хүрэх боломжоор ханга, хоббигоо ажил болгож чадах ажилтныг сонгон ав.” хэмээх үг нь бидний хувьд нэгийг бодогдуулж, нөгөөг хийх сэдлийг өгсөн юм.
Мөн бид BPN-ийн сургалтуудад жишээ болгон авдаг дэлхийн брэнд хутганы үйлдвэрлэгч Victorinox AG хувьцаат компаниар зочилж танилцсан. Чанар, хэрэглээ, инновац бол дэлхийн брэнд Victorinox-ийн үнэт зүйл юм. Тэд байгаль орчинд ээлтэй үйлдвэрлэлийг эрхэмлэж хог хаягдлаа дахин боловсруулж өөрийн үйлдвэртээ болон тосгоныхоо айл өрхүүдэд ашиглаж байгаа нь бидний анхаарлыг маш их татаж бас бахархаж байлаа.
Аяллын төгсгөлд Монгол улсаас Швейцарын Холбооны улсад суугаа элчин сайд Д. Гэрэлмаа манай хөтөлбөрийн оролцогч бизнес эрхлэгчдийг Берн хотноо хүлээн авч уулзсан. Уг уулзалтаар нэмүү өртөг шингээн бүтээгдэхүүн үйлдвэрлэж буй монголын үйлдвэрлэгч нар Европын Холбооны Улсууд руу бүтээгдэхүүнээ экспортлоход тавигдах чанарын шаардлагыг хангахуйц техник, технологитой болох болон экспорт хийхэд тулгарч буй асуудлуудын талаар санал бодлоо солилцсон юм.
Ийнхүү бид Швейцарын бизнес аяллаас олз омог ихтэй богц дүүрэн буцаж ирсэн.
Эрхэм бизнес эрхлэгчдэдээ сурсан мэдсэн, харсан, сонссон зүйлээ компанидаа хэрэгжүүлэхэд нь амжилт хүсье!
