Одоогоос 10 жилийн тэртээ Монголд BPN үүсгэн байгуулагдахад бизнес эрхлэгчдийн нийгэмлэгийн шав анх тавигдаж байжээ.
BPN-ийн хөтөлбөр өргөжихийн хирээр бизнес эрхлэгчид маань өөрсдийн сайн дурын үндсэн дээр эвлэлдэн нэгдэж туршлага хуваалцах болон санал бодлоо солилцох гүүр нь болсон нийгэмлэгийг үүсгэн байгуулсан.
Үүсгэн байгуулагдсанаас хойш цар тахлын хүндхэн үед нийгэмлэгийн гишүүд маань цар тахлыг хэрхэн даван туулах болон хямралыг боломж болгох талаар Швейцарын “Reinhard” компанийн удирдлагатай Live stream хийж цар тахлын үед хэрхэн ажиллаж байгаа болон авч буй арга хэмжээнүүдийн талаар ярилцсан нь сэтгэл санааны тус дэм болж цаашид үйл ажиллагаагаа явуулахад нь урам зориг өгсөн үнэ цэнтэй санаа дэвшүүлсэн уулзалт болж чадсан юм.
Нийгэмлэгийн гишүүд өөрсдийн бараа бүтээгдэхүүн, үйлчилгээг олонд таниулах мөн өөр хоорондоо танилцах журмаар бүтээгдэхүүн, үйлчилгээнийхээ танилцуулга хийх, загварын шоу зохион байгуулах зэргээр хамтран ажиллаж байна.
Мөн түүнчлэн Швейцар бизнес эрхлэгчдээс туршлага судлах бизнес аялалд хамрагдсан бизнес эрхлэгчдэд үр өгөөжөө өгч, уламжлал болж нийгэмлэгийн үндсэн үйл ажиллагааны нэг хэсэг болсон.
Бизнес эрхлэгчдийн нийгэмлэг өнөөдрийн байдлаар шинэ бүтэц зохион байгуулалттайгаар үйл ажиллагаа явуулж байгаа бөгөөд УЗ-д шинэ залуу бизнес эрхлэгчид ажиллаж байна.
Цаашид бид Монголын жижиг дунд бизнес эрхлэгчид тэр дундаа залгамж халаа болон хүч түрэн орж ирж буй 2-р үеийн залуу бизнес эрхлэгчдэдээ ахмад, туршлагатай бизнес эрхлэгчдийн туршлагаас хуваалцах, хурдтай хөгжиж буй эрчимжсэн нийгэм, эдийн засгийн орчинд хэрхэн нэмүү өртөг нэмэгдүүлэн өөрсдийн үнэтэй хувь нэмрийг оруулах тал дээр хамтран ажиллах болно.
Нийгэмлэгийн гишүүд бизнес эрхлэгчдээ BPN сангийн төлөөлөгчийн газар Монголд үүсгэн байгуулгагдсаны 10 жилийн ойн баярын мэнд хүргээд улам их амжилтыг хүсэн ерөөе!
