Бизнес академи
BPN-ийн “Бизнес Академи” нь бизнес эрхлэгчдэд Швейцарын системчилсэн арга зүйгээр бизнесийн удирдлагын мэдлэг олгох сургалтуудыг санал болгодог билээ. Удаан үргэлжилсэн Ковид-19 цар тахлын нөхцөл байдал эргээд хэвийн байдалдаа орсонтой холбогдуулан бид Бизнес Академийнхаа хүрээнд бүх сургалтуудаа эргээд танхимаар зохион байгуулж эхэлсэн. Энэ жил бизнес эрхлэгчдэд зориулан 11, байгууллага, хамт олонд зориулан 4, Хаан Банктай хамтарсан “Хөгжлийн Хөтөлбөр-2”-ийн хүрээнд 6, нийт 21 сургалтыг тус тус амжилттай зохион байгуулж дууслаа.
Тодруулбал захирлуудад чиглэсэн BPN-ийн үндсэн 4 сургалтууд болох “Бизнесийн удирдлага” сургалтыг 2 удаа, “Санхүүгийн менежмент”, “Маркетинг” болон “Хамт олноо удирдах” гэсэн сургалтуудыг тус тус 1 удаа амжилттай зохион байгууллаа. Бид үндсэн сургалтуудаас гадна хөтөлбөрийн оролцогчид, бизнес эрхлэгчдэдээ зориулан нэмэлт сургалтуудыг санал болгодог. Хамгийн их эрэлт хэрэгцээ бүхий “Цагийн Менежмент”, мөн шинээр санал болгож буй “Борлуулалтын өвөрмөц саналыг тодорхойлох нь” зэрэг сургалтуудыг тав тухтай орчин, гадаад мэргэжилтнүүдийн мэдлэг, ур чадвар болон найрсаг хамт олны чадварлаг зохион байгуулалт дор 200 гаруй оролцогчидтойгоор зохион байгууллаа.
Манай нийгмийн тулгамдсан асуудлуудын нэг болох “ЗӨВ ХАНДЛАГА”-тай байх талаар хөтөлбөрийн оролцогчдынхоо ажилтнуудад тусгайлан “Хандлагын менежмент”, “Байгууллагын ёс зүй” сургалтуудыг ажилтнуудаа сэдэлжүүлэх, урам зоригжуулах зорилго дор мөн байгууллагынхаа алсын харааг хамтдаа тодорхойлж компанийнхаа хөгжлийн түүчээ болох боломжийг олгох “Байгууллагын алсын хараа” гэсэн сургалтыг амжилттай зохион байгуулсан.
Хаан Банктай хамтарсан “Хөгжлийн Хөтөлбөр-2”-ийн тухайд 1 сарын хугацаатай үргэлжилсэн бөгөөд энэ хугацаандаа 6 шинэ сэдэвт сургалтуудыг санал болгосон. Дурдвал, BPN-ийн Эксперт пүүлийн зөвлөх Маркус Крамерийн “Брендинг” болон “Илүү их хэрэглэгч олох нь” мастерклассууд уг төслийн хүрээн дэх шинэ сургалтууд байлаа. Энэхүү хөтөлбөрт хамрагдсан оролцогчид үнэхээр сэтгэл хангалуун байсан ба агуулга баялагтай, зохион байгуулалт сайтайгаас гадна сурсан зүйлсээ шууд амьдрал дээр хэрэгжүүлэх боломжтойг онцолж байсан юм.
“Боловсрол эзэмшихийн зорилго нь мэдэхэд бус хэрэгжүүлэхэд оршино” гэдэг.
Энэ дашрамд BPN-ий сургалтуудад хамрагдсан бүх оролцогчдодоо сурсан, мэдсэн зүйлсээ өөрсдийн бизнестээ хэрэгжүүлэхэд нь амжилт хүсье!
Ирэх 2023 онд бид Швейцар экспертүүдээс гадна дотоодын чадварлаг сургагч багш нартай хамтран бизнес эрхлэгчдийнхээ хэрэгцээ шаардлагад нийцэхүйц, цаг үеэ мэдэрсэн сургалтуудыг санал болгон ажиллах болно.
Эх орныхоо хөгжилд үнэтэй хувь нэмэр оруулж буй эрхэм баялаг бүтээгч та бүхэнтэй хамтран ажиллахдаа BPN-ийн зүгээс үргэлж таатай байх болно.
